Pejalai Tahun 2011

Nyau enda berasai Tahun 2011 udah ka ngelepas ke diri ninggal ke kitai. Baka tahun- tahun ke udah, pejalai Tahun 2011 endang maiuh meri kitai cerita dalam pengidup ke digaga kitai ngelama tu. Tiap iko kitai endang bisi pengiruh dalam hari- hari ke ka datai, smuanya kena kitai mutar ke pengidup kitai enggau family,apai indai, kaban belayan, bala sama opis enggau enda lari mega bala orang ke beguna ke kitai ke nda ngira bansa serta pengarap. Tahun 2011 ba tiap kitai endang bisi meri reti ba kitai serta semuanya disasai ke kitai empu. Manah, enda manah serta utai bukai sama kitai empu ngenang. Kitai semampai ngenang utai ke manah tang taja pia utai ke bukai sma meh kitai ngubah ba tahun ke ka datai. Nadai ngira kitai kerja perintah tauka kerja swasta, kerja betanam, bumai tauka pengawa tradisi kitai, Tahun 2011 endang semampai meri jalai dalam pengidup kitai. Ba pemidik nasib engka bala kitai maia nya bc bulih pengawa ke manah agi, bulih pangkat ke tinggi ari ke ngelama tu, bulih anak menantu, bulih rumah baru, kereta baru, bulih pengerai, gerai ari sebarang pemedis, pengerai ti meruan, pemujur dalam belajar, bulih padi, bulih reta serta utai bukai ke endang semampai disampi dipinta kitai ngelama tu. Ba senentang penusah kita anang ngenang laban endang gaia pengidup kitai sigi semampai enda lari arinya, tang kitai seruran besampi ngambi ke jauh serta enda ditinggang utai ke disebut penusah. Pengelantang dalam pejalai Tahun 2011 ba tiap iko kitai tebantai maia kitai ngenang semuanya dalam ati lalu ngasai ke semuanya udah ayan ba mua mata kitai. Kitai sama meda ba diri kitai empu nama hasil serta penguntung ke udah diulih kitai. Ngarap ke Tahun 2011 ulih meri kitai peransang dalam ngereja pengawa betungkat ke utai ti udah dikereja kitai serta Tahun 2012 ke ka datai tu ila ulih meri kitai peluang pia mega jalai ke manah agi dalam pengidup kitai. Arap ke semua kitai Gerai, Lantang Senang serta Semampai Gaga dalam semua pengawa. Selamat Nyambut Hari Christmas enggau Selamat Nyambut Penatai Tahun 2012.